Respuestas
“Colombianos Oprimidos” ta e nomber di un grupo anonimo cu a skirbi un carta dirigi na Minister di Relacion Exterior di Colombia, sra. Maria Angela Holguin, caminda nan ta haci un serie di denuncia masha delicado den direccion di Consul di Colombia na Aruba. E carta encuestion hunto cu varios documento a ser manda no solamente na e mandatario Colombiano, sino na diferente instancianan, dignatarionan, funcionarionan, y medionan di comunicacion, tanto Colombiano como local entre nan ArubAwe.
E ta un carta di tres blachi, caminda no solamente e grupo aki ta denuncia cu Consul Colombiano na Aruba tin un comportacion “grosero, desleal y despota” cu e comunidad Colombiano y empleadonan, sino cu nan ta indica cu e diplomatico aki supuestamente a comete algun iregularidad.
E acusacionnan di e grupo asina yama “Colombiano Oprimido” ta serio entre nan, supuesto presentacion di documentonan falso pa haya permiso di trabou pa un posibel famia di dje; maneho dudoso riba pago di salarionan, faborece persona pa dunamento di contract; mal uzo di placa pa paga servicionan cu no a ser realisa.
Entre otro nan a indica cu Consul di Colombia a contrata un famia di dje di origen Venezolano, kende supuestamente ta ganando tres salario, e prome como funcionario, e di dos pa servicio di mensahero; y e di tres como IT. Igualmente nan ta tilda e hecho aki como “desleal acto hacia la patria”, mirando cu un ciudadano Venezolano ta realisando trabou administrativo den Consulado di Colombia na Aruba.
ArubAwe no kier drenta mas den detaye riba e contenido di e carta; y e divulgacion di documentonan cu e grupo “Colombianos Oprimidos” a manda na diferente e-mail adres diadomingo ultimo.
CONSUL DI COLOMBIA
Unabes cu e denuncia aki a drenta diadomingo ultimo na ArubAwe, e media aki a tuma contacto cu Consul di Colombia na Aruba, sra. Mirza Gnecco Plá pa tende su version of banda di medaya. E diplomatico aki no tabata na altura di e tipo di denuncia aki cu a wordo haci den su direccion. Pa tal motibo ArubAwe a e-mail p’e tur e filenan cu e grupo anonimo “Colombianos Oprimidos” a manda.
Ayera, ArubAwe a papia cu Consul di Colombia kende a lamenta e tipo di denuncia aki. E diplomatico tabata masha reserva pa drenta den detaye riba e contenido di e carta di e grupo “Colombianos Oprimidos”.
Den su declaracion masha cortico sr. Gnecco Plá a rechasa tur acusacion ya cu nan no ta refleha e trabou cu Consulado di Colombia ta bin realisando, y el a laga sa cu e mes a pone Canciyer di Colombia na altura di e situacion desagradabel aki. El a reitera cu e carta controversial aki no ta refleha e bon servicio cu nan ta dunando na tur hende cu ta bishita e Consulado.
Igualmente el a lamenta cu documentonan a ser saca sin autorisacion for di filenan di e Consulado; y e hecho aki lo ser investiga debidamente. Unabes mas Consul di Colombia na Aruba a reitera na ArubAwe cu e ta prefera di no duna mas detaye; y laga cu un investigacion lo tuma lugar pa asina aclaria tur cos rond di e asunto fastioso aki.